Seltjarnarneskirkja

Nýverið fóru fram tvennir stórmerkilegir tónleikar á Nesinu. Þeir fyrri voru djasstónleikar í félagsheimilinu og seinni tónleikarnir voru klassískir einleikstónleikar í kirkjunni. Tónleikarnir voru haldnir til fjáröflunar fyrir þakmálun Seltjarnarneskirkju, en aðgangseyririnn gengur óskertur til umrædds verkefnis.  Þak kirkjunnar hefur legið undir skemmdum þar sem ekki hefur fengist fjármagn til að mála það. Fjárframlög til kirkjunnar hafa verið skorin umtalsvert niður vegna efnahagskreppunnar og því ákvað sóknarnefndin að hefja fjáröflun sl. vor til að geta framkvæmt umrætt verk sem mun kosta um tvær milljónir króna.

Í Seltjarnarneskirkju er boðið upp á fjölbreytt starf fyrir börn á leik og grunnskóla aldri  Með starfinu vill kirkjan bjóða upp á spennandi valkost í tómstundastarfi á Seltjarnarnesi þar sem sérstök áhersla er lögð á gott samfélag.   Tilgangurinn  með starfinu er að kenna börnunum í gegnum sögur, söngva og leiki um kristna trú og siðfræði.  Við hvetjum foreldra til að fylgjast með og hvetja börnin sín til að taka þátt í þessu mikilvæga starfi sem innt er af hendi.  Barna- og æskulýðsstarfið hófst með leikjanámskeiðum sem haldin voru fyrir börn á aldrinum 4-9 ára, vikurnar 3-6 . og 9.-13.ágúst.

Námskeiðin heppnuðust virkilega vel og höfðu bæði börn og leiðtogar gaman af. Það var meðal annars farið í Heiðmörk og Maríuhellar skoðaðir, Árbæjarsafn var heimsótt, farið var í sund, bæjarferðir, fjölskyldu- og húsdýragarðinn svo og ýmislegt fleira. 

Sunnudagaskólinn verður á sínum stað og hefst kl. 11 í guðsþjónustu og eftir hópsöng barnanna í upphafi, ganga þau svo niður á neðri hæð kirkjunnar þar sem starfið heldur áfram.

Starf fyrir 6-12 ára börn hefst 7. september og  er á þriðjudögum kl. 15-16.

Æskulýðsstarfið hefst 12. september, fyrir 8, 9 og 10. bekk og verður annað hvort sunnudagskvöld , kl. 20-22.

Það verður fjölbreytt og skemmtileg dagskrá í vetur og verður henni dreift í skólana í byrjun september. Þar ættu allir að geta fundið sér eitthvað við sitt hæfi.